Day 396
今日柯豬兩餐 lunch 同 dinner 都係有汁飯！天氣太凍，有汁易食又暖粒粒！
『三文魚蘑菇洋蔥』
三文魚刺身2-3片
白蘑菇1粒
洋蔥 隨意
蒜頭 半粒
麵粉1茶匙
滾水半杯
-白蘑菇，洋蔥，蒜頭全部切碎，燒熱少少油，炒香白蘑菇同洋蔥，最後先加蒜頭(因為易燒焦)。
-到香味十足又帶金黄色，加麵粉再炒多陣。
-落滾水，略略攪拌，落三文魚，冚蓋，最細火煮2分鐘，將熟左嘅魚肉拎起，用筷子/叉稍為整散。
-如果汁未杰/太多水，開大個火煮到你鐘意嘅濃杰度。
-魚肉放回落蘑菇洋蔥汁，完成！
『帶子紫蘿蔔澳洲青瓜蘑菇洋蔥』
帶子(細細粒) 8-10粒
紫蘿蔔1小段，去皮，切粒
澳洲青瓜1小段，切粒
白蘑菇1粒，切碎
洋蔥，隨意，切碎
麵粉 大半湯匙
滾水 大半杯
無鹽牛油 1茶匙
-燒熱鑊，落牛油，將帶子煎香，拎起備用(唔好煮到全熟)。
-同一個鑊炒香紫蘿蔔→澳洲青瓜→蘑菇&洋蔥，全部蔬菜都炒香，落麵粉繼續炒多陣。
-落滾水，攪拌，轉中慢火煮到收汁杰身，放番帶子入去略煮多1分鐘左右，完成！
Search